A seriyasında 20-ci turdan təxirə salınan oyunda “Salernitana” doğma arenada “Venetsiya” ilə üz-üzə gəlib.
Elitada qalmaq uğrunda mübarizə aparan komandaların görüşündə hesab 7-ci dəqiqədə açılıb. Meydan sahiblərinin heyətində Federiko Bonatsoli penaltini dəqiq yerinə yetirib. 1-ci hissə “Salernitana”nın minimal hesablı üstünlüyü ilə bitib. 2-ci hissədə Toma Anri tarazlığı bərpa edib. Amma 67-ci dəqiqədə Simone Verdi “Salernitana”nın qələbə qolunu vurub - 2:1. Son 5 görüşünün 4-də qalib gələn komanda 29 xalla 17-ci pilləyə yüksəlib. “Salernitana” bu nəticə ilə “Kalyari”ni 1 xal qabaqlayıb və rəqibinin düşmə zonasına enməsinə səbəb olub. Maraqlıdır ki, növbəti turda bu arenada “Salernitana” məhz “Kalyari”ni qəbul edəcək. Ardıcıl 10-cu oyununda uduzan “Venetsiya” isə 22 xalla autsayderdir. Sona 3 tur qalmış “Salernita”ndan 7 xal geri olan “Venetsiya”nın riyazi cəhətdən A seriyasında qalmaq imkanları qalsa da, bu elə də real görünmür.